Imersija

Metoda imersije (zanurjenje do rěče) płaći dźensa jako z wotstawkom najwuspěšniša metoda posrědkowanja rěče w předšulskej starobje.

Rozsudne při tym je, zo ma při nawuknjenju druheje rěče nic jenož zažny započatk, ale tež intensita rěčnych kontaktow rozsudny wuznam.

W pěstowarnjach to woznamjenja, zo njeposkićuja so aktiwity w prěnjej rěči, ale wot maćerno-rěčnje wukubłanych a kwalifikowanych kubłarkow w druhej rěči.

Programy imersije praktikuja so hižo dlěje hač 20 lět w sewjernej Americe, Awstralskej a w někotrych europskich krajach, kaž w Francoskej, Finskej, Španiskej a Waliziskej.

Wuknjenje po metodźe imersije

Imersija runa so w mnohim přirodnemu nawuknjenju rěče. To poradźi so tež z druhej rěču. Nawuknjenje prěnjeje rěče njetrjeba perfektne być, zo by so dalša rěč nawuknyć móhła. Zmylki su spočatnje normalne, na nich hodźi so jara derje postup při wuknjenju přirunać. Wažne je wobknježenje maćerneje rěče wotpowědujo starobje dźěsća přez prawidłowne nałožowanje w swójbje.

Jedna rěč – jedna wosoba

Princip „jedna rěč – jedna wosoba“ woznamjenja, zo rozmołwjeja so serbskorěčne kubłarki z dźěćimi jenož serbsce.

Při metodźe imersije njetrjebaja dźěći wšitke słowa zrozumić. Spočatnje dosaha, zo wědźa wo čo dźe. So wospjetowace rituale, kaž strowjenje, myće, jědź atd. zapřimnu dźěći spěšnje. Při tym njepřewidźa wězo wšitke rěčne struktury, ale najwažniše je, zo móža sej samostatnje wuwědomić, wo čo dźe.

Podpěra přez staršich

Staw wuwića maćerneje rěče móže so předewšěm přez to zaručić, zo so rěč doma w trěbnej měrje wužiwa a zo su starši druhej rěči přichileni. Sobudźěło staršich je přewšo wažne.

Slědźenje na polu mozow

Aktualne slědźenje je dopokazało, zo maja dźěći kmanosć, rěč wědomje reflektować. Woni tworja poćahi, zarjaduja słowa a zjimaja samostatnje informacije. Zhromadnosće a rozdźěle mjez maćernej a druhej rěču woni samostatnje spóznaja.

Tak so přez rozmołwy staršich a kubłarkow z dźěćimi automatisce tež gramatika posrědkuje. Mozy čłowjeka spóznaja tute struktury w dalokej měrje njewědomje. Wědomje nawuknjene prawidła so bohužel často spěšnje zabudu.

Kubłarki wužiwaja serbsku rěč, zo bychu wobsahi, začuća a poćahi zwuraznili. Dźěći napodobnjeja kubłarki, dokelž wuwiwaja so pola nich samsne potrjeby. Rěč je za to spomožna a skutkowna.

Zakładna šula

Přez wuske zhromadne dźěło ze zakładnymi šulemi docpěje so optimalny přechod, kaž je to w kubłanskich a zdźěłowanskich planach Sakskeje a Braniborskeje předwidźane.

Nazhonjenja

Po wjac hač 10-lětnych nazhonjenjach SŠT móžemy zwěsćić, zo je niwow rěčnych kmanosćow w druhej abo cuzej rěči pola dźěći, kiž wuknu po metodźe imersije, signifikantnje wyši hač pola dźěći, kiž druhu rěč hakle w šuli wuknu. Rozsudne je, zo njebuchu při wobknježenju prěnjeje resp. maćerneje rěče w zakładnej šuli žanežkuli deficity zwěsćene.