Metody modeloweho projekta Witaj

Bretoniskim dźěćom w Francoskej so hižo 30 lět dołho w pěstowarnjach towarstwa DIWAN po metodźe imersije bretoniska rěč posrědkuje. Za to wuwi so specielna metodika přiswojenja rěče w pěstowarnjach po přikładźe Kanady, kiž bu ze swójskimi nazhonjenjemi wudospołnjena.

Zakładna ideja posrědkowanja rěče je, zo tworja kubłarki z dźěćimi swójbam podobne skupiny. Runja maćeri rěči kubłarka stajnje z dźěćimi. Dźěći wobdawaja so tak z rěču kubłarki a zanurja so do wěsteje rěčneje wokoliny. Imersija rěka zanurjenje do rěče.

W předšulskej starobje přiswoja sej dźěći druhu abo samo třeću rěč podobnje lochko kaž prěnju rěč. Kmanosć přiswojenja rěče je pak na zažne žiwjenske lěta wobmjezowana a so hižo w šulerskej starobje poněčim zhubi.

Zažna dwurěčnosć wjedźe k wjacerěčnosći a zrozumjenju za dalše rěče a kultury.

Při přiswojenju rěče rozeznawamy tři fazy:

1.faza: wotpokazanje

Spočatne wotpokazanje dźěsća móže za staršich jara frustrěrowace być. Ale tajke zadźerženje njeje njewšědne. Jeli starši ze swojim dźěćom sobu wuknu, hodźi so tuta faza lóchšo přewinyć.

2.faza: mjelčenje

Je móžno, zo dźěćo při nałožowanju druheje rěče waha, samo hdyž hdźe wo wěcy z bliskeje wokoliny, na kotrež wone pozdatnje reaguje. Tuta faza připosłuchanja słuži zrozumliwosći, kaž ju podobnje pola ćěšenkow namakamy.

3.faza: prěnje nałožowanje

Bjez nuzowanja započina dźěćo z nałožowanjom druheje rěče, často za ćichim. To móže so na přikład při spěwanju abo hrajkanju stać.