Stawizny modeloweho projekta Witaj

1990-towaršnostne změny

Šule

Ze zjednoćenjom Němskeje w lěće 1990 zahaji so přestrukturowanje šulstwa, kiž sta so ze zawjedźenjom principa federalizma z winowatostnym nadawkom kóždeho zwjazkoweho kraja.

Serbske a dwurěčne šule zarjaduja so do šulskeju systemow Sakskeje a Braniborskeje a maja samsne kubłanske a zdźěłowanske cile a wotzamknjenja kaž němske šule w tutymaj krajomaj. Dotal praktikowane rozeznawanje wučby serbšćiny w statusu maćerneje abo druheje resp. cuzeje rěče njehodźeše so na zakładźe enormnje spadowacych šulerskich ličbow a změnjenych šulskich strukturow w Sakskej hižo zdźeržeć.

Pěstowarnje

Dwurěčne serbsko-němske institucionelne kubłanje bu z nałožowanjom modeloweho projekta Witaj do pěstowarnjow přepołožene. Serbske šulske towarstwo je modelowy projekt Witaj po ideji bretoniskeho DIWAN-modela k spěchowanju a rewitalizaciji serbskeje rěče wuwiło.

Program rewitalizacije

Bytostny cil modifikowaneho rewitalizaciskeho programa je kubłanje aktiwnje serbsku rěč nałožowacych dźěći. Přez metodu dospołneje imersije hižo w zažnej starobje so dźěći po přeću staršich do serbskeje rěče zanurja. Z tym přihotuje so optimalny přechod wot Witaj-metody k metodźe 2plus resp. k bilingualnej wučbje. Hač k zastupej do zakładneje šule wobknježa tute dźěći wotpowědujo swojemu stawej wuwića dwě rěči a maja tak w prěnim lětniku hižo předskok wědy porno jednorěčnym dźěćom.

Cil

Móžemy wo zbožu rěčeć, zo padnychu w prawym wokomiku prawe rozsudy na prawych městnach, kiž spjelnja fundamentalne krajnopolitiske naležnosće Sakskeje a Braniborskeje, mjenujcy zdźerženje, dalewuwiće a rewitalizaciju hornjo- resp. delnjoserbskeje rěče.

Smy hižo zwěsćili, zo wjedźe zažna dwurěčnosć wjele spěšnišo k wjacerěčnosći a zo spěchuje wona tolerancu a zrozumjenje za dalše rěče a kultury.

Witaj pokročuje so w Sakskej z koncepciju 2plus a w Braniborskej z bilingualnej wučbu. Rěčne a kulturne tradicije hornjo- a delnjołužiskich Serbow so tak w nowym času dale wjedu.